Nuorttabeale boazodoalloguovllu guovžabivdu nohkamin

Suoma fuođđoguovddáš ávžžuha boazodoalloguovllu guovžabivdiid váldit vuhtii dihtomearredili ja sálažin ožžojuvvon guovžžaid almmuheami dakka viđe guovžža báhčima maŋŋá.

Čavčča guovžabivdu lea ovdánan johtilit boazodoalloguovllu nuorttabeale dihtomearreguovllus. Borgemánu 20. beaivve álgán guovžabivddus leat ožžon sálažin nuorttabeale boazodoalloguovllus jo 53 guovžža, nuba 60 guovžža dihtomearis leat vel čieža guovžža. Oarjjabeale dihtomearreguovllu 25 guovžža dihtomearis leat goddán easkka vihtta guovžža.

Nuorttabeale dihtomearreguvlui gullet Ohcejoga, Anára, Soađegili, Pelkosenniemi, Suovvaguoikka, salla, Guossáma ja Suomussalmi gielddat ja oarjjabeale boazodoalloguvlui earát boazodoalloguovllu gielddat. Eanemus guovžžaid leat goddán dán čavčča bivddus Suomussalmis (22), Guossámis (13), Sallas (9) ja Anáris (5). Oarjjabeale dihtomearreguovllu guovžžain golbma leat goddojuvvon Hyrynsalmis.

Suoma fuođđoguovddáš ávžžuha meahccebivdiid váldit vuhtii dihtomearredili guovžabivddus eandalii dál go dihtomearrebivdu lea dievvamin. Lassin fuođđoguovddáš muittuha, ahte meahcásteaddjit galget dahkat lágas ásahuvvon sálašalmmuhusa boazodoalloguovllu guovžža njeaidimis Suoma fuođđoguovddážii spiehkastatlohpeásahusa (8 § 3 mm) mielde dakka viđe guovžža goddima maŋŋá. Sálašalmmuhusa sáhttá dahkat juogo Oma riista -bálvalussii dahje šleađgapoastta bokte čujuhussii lappi@riista.fi

Šleađgapoasttain guđđojuvvon sálašalmmuhusas galget leat čuovvovaš dieđut: 1) guovžža njeaidán bivdi namma, čujuhus ja telefonnummir, 2) njeaidinbeaivi ja diibmoáigi, 3) njeidojuvvon guovžža sohkabealli, 4) njeaidinbáikki gielda, báikki namma ja njeaidinbáikki GPS-kordináhtat. Oma riista -bálvalussii dát dieđut girjejuvvojit álkit sálašalmmuhusa dahkama oktavuođas. Suoma fuođđoguovddáš muittuha maiddái, ahte lágas ásahuvvon sálašalmmuhusa guovžža njeaidimis ii sáhte vel dahkat Oma riista mobiilavuogádagain, muhto dan galgá sáddet Oma riista bláđánveršuvnna bokte.

Dihtomeari dievadettiin Suoma fuođđoguovddáš mearrida guovžabivddu dihtomearreguovllus (oarjjabeale/nuorttabeale) heaittihuvvot. Jus dihtomearri reahkká loahpa rádjai, guovžabivdu nohká maŋimustá 31.10.

Čakčat 2016 boazodoalloguovllus njeide 69 guovžža, main 54 nuorttabeale ja 15 oarjjabeale dihtomearreguovllus.

 

Lassidieđut: Harri Norberg t. 029 431 2115

Dihtomearreguovžabivddu dilli

Guovžasállašat

Guovžža dihtomearrebivdu boazodoalloguovllus