Vearjju fievrridanlobit sirdásit boliisat Suoma fuođđoguovddážii

Meahcástanlága oasseođastus bođii fápmui 1.8.2017. Láhkanuppástusain meroštallet dárkilabbot vearjjuid fievrrideami meahcis mohtorfievrruin.

Badjeolbmuid vearjjuid fievrridanlobiid lea ovdal mieđihan boles. Láhkanuppástusa mielde dát doaibma sirdásii Suoma fuođđoguovddážii. Leat buorit ákkat ja áššehasaid dáfus lunddolaš, ahte lohpedoaibmaváldi sirdojuvvo bolesis Suoma fuođđoguovddážii, dasgo ná Suoma fuođđoguovddážii bohtet meahcástanláhkii laktáseaddji lohpebálvalusat.

Lobit, maid boles lea mieđihan, leat fámus lohpeáiggi lohppii.

Suoma fuođđoguovddáš boahtá čuovvut lohpemieđiheamis bolesa ovdamearkka. Badjeolbmo vuoigatvuođa dahje lobi fievrridit vearjju mohtorfievrruin galgá ohcat ohcanskoviin, mii gávdno čujuhusas: https://riista.fi/metsastys/lomakkeet/poikkeuslupalomakkeet/hakemus-metsastysaseen-jatai-metsastysjousen-kuljettamiseen/

Ohcamušskovi galgá sáddet boastta fárus čujuhussii:

Suomen riistakeskus, LH-kirjaamo

Sompiontie 1, 00730 Helsinki

dahje e-poasttain: lupahallinto.kirjaamo@riista.fi

Badjeolmmoš galgá ohcat lobi persovnnalaččat mearreáigái (omd. eanemustá viđa jahkái). Ohcamušas galgá meroštallat guovllu, mii lea geavatlaččat bálggus. Dasa lassin ohcamušas galgá máinnašit fievrru ja vearjotiippa, mat leat anus ohcamuša dagadettiin. Ohcamuša čuovusin galgá laktit bálgosa boazoisida cealkámuša vearjju fievrridandárbbus boazodoallobargguid oktavuođas. Dasa lassin ohcamuša čuovusin gánniha laktit bolesa ovdalis mieđihan lobi, juos beare ohccis lea dakkár. Dása lea sivvan dat, ahte Suoma fuođđoguovddáš sáhttá čuovvut bolesa lohpemieđiheami válljejumiid.

Vearjju fievrridanlohpi máksá 33 euro (haddi lea seammá go bolesis ovdal). Dasa lassin Suoma fuođđoguovddáš sáhttá bidjat lága olis dárkilut mearrádusaid vearjju fievrrideapmái.

Suoma fuođđoguovddážis lea maid doaibmaváldi váldit mieđihuvvon lobi eret, juos lobi oažžu rihkku meahcástanlága dahje dan bokte ásahuvvon njuolggadusaid. Seammá guoská maid guovddáš lohpeeavttuid rihkkuma. Juos lohpi lea gessojuvvon eret, de seamma meahcástanjagi ii sáhte mieđihit ođđa lobi ovdalgo ovddit šluhttejuvvon lobi eretgeassin lea lágalaččat čovdojuvvon dahje eretgeassin lea gomihuvvon.

Lassedieđut: Sauli Härkönen, almmolaš hálddahusbargguid hoavda, Suoma fuođđoguovddáš,
tel. 029 431 2104, sauli.harkonen@riista.fi