Siirry sisältöön

Vahágiidda vuođđuduvvi spiehkastatlobiiguin sálašin gávcci geatkki

Suoma fuođđoguovddáš mieđihii ođđajagi-guovvamánus spiehkastatlobiid oktiibuot gávcci geatkki goddimii. Dát geatkkit ledje dahkan boazovahágiid. Fuođđoguovddáš biehttalii mieđiheamis muhtun spiehkastatlobiid. Spiehkastatlobiin ožžo sálašin guovvamánu loahpa rádjái guhtta varrása ja guokte njiŋŋelasa. Luondduriggodatguovddáža dutkamušaid mielde goddojuvvon njiŋŋelasat ledje rávis geatkkit, mat ledje čovjon, muhto eai lean velá guoddán čivggaid dán dálvái.

Spiehkastatlobiiguin, maid ledje vahátákkat, bivde golbma vihtta geatkki Lappis, Davvebađaeatnamis guokte ja Kainuus ovtta geatkki.  Getkkiid godde Soađegilis, Gihttelis,  Anáris, Suovvaguoikkas, Sallas, Guossámis, Taivalkoskis ja Suomussalmis.

Eana- ja meahccedoalloministeriija lei ásahusas mearridan, ahte spiehkastatlobiid sáhtii mieđihit dán jagi eanemustá gávcci geatkái. Ministeriija ásahusa mielde spiehkastatlobiid sáhtii mieđihit dušše geatkenáli dikšunplánas meroštallojuvvon boazodoalloguovllu davvi ja nuorta nálledikšunguovlluide, gos geatkki dahkan vahágat leat stuorimusat. Spiehkastatlobiin, main lea vahátvuođđu, lea dárkkuhus geahpedit getkkiid dahkan boazovahágiid meari. Geatkki dahkan boazovahágat buhttejuvvojit  jahkásaččat eanet go eará stuorraspiriid dahkan vahágat oktiibuot.

Luondduriggodatguovddáš golggotmánu loahpas addán cealkámuša mielde Suomas árvvoštallet leat 220-250 geatkki. Geatki lea leavvan maŋimuš jagiid áigge ain eanet boazodoalloguovllu  máttabeallái ja geatkki sáhttá vuohttit maid máttimus Suomas.

Additional information