Suoma fuođđoguovddáža mieđihan vahátákkalaš spiehkastatlobiiguin godde vássán dálvvi áigge gávcci geatkki. Spiehkastatlobiiguin bivde Lappis vihtta ja Kainuus golbma geatkki. Eanodagas, Hyrynsalmis, Sallas ja Soađegilis ožžo sálašin ovtta geatkki, Suovvaguoikkas ja Suomussalmis guokte.
Sálašin ožžojuvvon getkkiin njeallje ledje varrásat ja njeallje njiŋŋálasat. Luondduváriidguovddáža dutkamušaid mielde guokte njiŋŋálasain ledje čivgan dán dálvve. Dát geatkkit goddojuvvojedje Soađegilis ja Suomussalmis
Spiehkastatlohpemearrádusaid eaktun lei, ahte bivddus galgá figgat sihkkarastit, ahte ii goddojuvvo njiŋŋálas geatki, mas leat čivggat beasis dahje man vuollel jagi ahkásaš čivga čuovvu. Suoma fuođđoguovddáš čielggadahttá, mo lohpeeavttuid leat geavadis heivehan.
Eana- ja meahccedoalloministeriija ásahan alimus lobálaš sálašmearri vássi bivdojahkái lea ovddit jagiid meahcástanjagiid láhkai gávcci geatkki. Ministeriija ásahusa mielde spiehkastatlobiid sáhttá mieđihit dušše geatkenáli dikšunplánas meroštallojuvvon davvi ja nuortta boazodoalloguovllu nálledikšunguvlui, gos geatkki dahkan boazovahágat eanaš leat. Geatkkit leat oasálaččat badjel bealis stuorrabeađuid dahkan boazovahágiin, mat leat buhttejuvvon.
Luondduváriidguovddáža mielde Suomas árvvoštalle lean dálvit 2017/2018 oktiibuot 270-300 geatkki, main 120-140 boazodoalloguovllus. Geatkenálli lea sturron olles riikkas ja leavvan maŋimuš jagiid ain eanet maiddái boazodoalloguovllu máttabeale guvlui. Geatkki luottaid sáhttá otná beaivve oaidnit gitta máttimus Suoma ráje.