Suoma fuođđoguovddáš lea mieđihan guokte geatkki goddima várás sierralobiid Giehtaruohttasa bálgosa vahátguovlluin Eanodagas. Goddinlobit leat mieđihuvvon dakkár getkkiide, mat leat dagahan earenoamáš ollu vahágiid boazodollui.
Mieđihuvvon sierralobiiguin lea ulbmil eastit dáhpáhuvvamis earenoamáš stuorra vahágiid boazodollui. Ovddit jagiid vásáhusaid vuođul lea dieđus, ahte giđđadálvvi muohtadilli lea oiddolaš geatkái ja danin geatki dagahage vahágiid justa dalle. Hui ráddjejuvvon sierralohpi lea mieđihuvvon daid geatkki ássanguovlluide, gos leat gávnnahan earenoamáš ollu geatkevahágiid. Vejolažžan dahkkojuvvon ja ráddjejuvvon bivdu ollašuhttá geatkenáli dikšunplána.
Eanan- ja vuovdedoalloministeriija ásahusas stuorimus vejolaš sálašmearrin bivdojahkái 2016-2017 lea biddjojuvvon gávcci geatkki. Ásahusa mielde sierralobiid sáhttá mieđihit dušše geatkenáli dikšunplánas meroštallojuvvon boazodoalloguovllu davve- ja nuortaosiid geatkenáli dikšunguvlui, dohko gos geatkkit dagahit eanemus boazovahágiid.
Ovdal mieđihuvvon sierralobiid vuođul leat goddán njeallje varrisgeatkki, main guokte Anáris Bátneduoddara ja Sállevári bálgosiid guovlluin, okta Sallas Davvi-Salla bálgosa guovllus ja okta Soađegilis Sámi bálgosa guovllus.
Lassedieđut:
Sami Tossavainen, fuođđohoavda, Suoma fuođđoguovddáš Lappi
tel. 029 431 2304 sami.tossavainen@riista.fi
Urpo Kainulainen, fuođđoplánejeaddji, Suoma fuođđoguovddáš Lappi
tel. 029 431 2252 urpo.kainulainen@riista.fi