Ovddit meahcástanbajis Lappis ožžo sálašin 9033 ealgga, main goalmmátoassi ledje miesit. Mieđihuvvon 10 403 bivdolobis geavahedje 72 proseantta. Dál mieđihuvvon bivdolobiin lea vejolaš bivdit badjel 14 000 ealgga.
Čavčča 2020 meahcástanbadjái mieđihuvvon bivdolohpemeari vuođđun lea Lappi guovllolaš fuođđoráđi giđđat 2018 Lappi ovcci ealgadoalloguvlui ásahan ealganáli dávjodatmihttomeriin. Mihttomearit leat ealgadoalloguovlluid guovdu ja fámus golbma jagi – čuovvovaš háve mihttomearit ásahuvvojit giđđat 2021. Mihttomearregaskkat ealgadávjodahkii leat vuolimusat Davvi-Sámis ja alimusat Mátta-Lappis. Mieđihuvvon lohpemeriin ealggaid dagahan vahágiid figgat doallat govttolaš dásis, váldimiin vuhtii guovllolaš sierrasárgosiid ealganáli dikšumis ja seailluhit ealganáli eallinfámolažžan.
Luondduriggodatguovddáža árvvoštallama mielde dálvádan ealganálli Lappis lei sulaid 20 400 ealgga. Nálleárvvoštallama mielde ealganálli lea njiedjan jagi 2016 rájes. Jahkásaččat dahkkon nálleárvvoštallan lea máhccevaččat bajidan ovddit jagiid nálleárvvoštallama. Lappi ealganális leat ožžon dárkkálnuhtti dieđuid Luke ollašuhttán girdinrehkenastimiin. Mannan dálvve rehkenastimat dahkkojuvvojedje Roavvenjárgga ja Soađegili fuođđodikšunservviid guovllus. Nálleárvvoštallamis dehálaš rollas leat bivddu oktavuođas merkejuvvon ealgadieđut ja ealgabivdiin sávvat aktiivvalašvuođa áicamiid merkemii dán čavččage
Jagi 2019 Vuovdeguovddáža (Metsäkeskus) árvvoštallamiid mielde vuovdevahágiid viidodat priváhtavuvddiin lei 713 hektára. Vahátviidodat gahčai measta beallái jagi 2018 ektui. Ealgalihkohisvuođaid mearri geaidnojohtalusas jagi 2019 Lappi guovllus lei EBI-guovddáža mielde 172, go jagi 2018 lihkohisvuođat ledje 116. Lappi fuođđodikšunservviid SRVA-doaibmiid merkemiid mielde johtalusbárttiid mearri lei álgojagi 2020 leamaš unnit go maŋimuš jagiid dávisteaddji áigodaga mearri.
Eana- ja meahccedoalloministeriija lea evttohan Lappi guvlui bivdoáigái nuppástusa nu, ahte bivdu joatkašuvašii ragatráfáiduhttima maŋŋá jo golggotmánu vuosttas lávvardaga. Meahcástanásahusa evttohusas lea jođus cealkináigi. Evttohusa mielde ođđa bivdoáigi galggašii boahtit fápmui ovdal bivdobaji álgima. Bivdoáiggi nuppástusas dieđihuvvo maŋŋelis.
Additional information
Tossavainen, Sami
- Fuođđooaivámuš, Lappi
- Ml 8 paragráfa guovlu
- 029 431 2304
- sami.tossavainen@riista.fi