Suoma fuođđoguovddáš mieđihii dán dálvái vahátákkalaš spiehkastatlobiid golmma geatkái. Lobiin guokte ledje Hyrynsalmi ja Suomussalmi guovllus lean lohpeguvlui ja okta Eanodahkii. Lassin Fuođđoguovddáš dagai spiehkastatlohpeohcamušaide golbma biehttaleaddji mearrádusa.
Suoma fuođđoguovddáža mieđihan spiehkastatlobiin ožžo vássán dálvvi áigge sálašin golbma geatkki. Dáin guokte godde Hyrynsalmis ja ovtta Eanodagas. Buot goddojuvvon geatkkit ledje varrásat.
Eana- ja meahccedoalloministeriija ásahan alimus lobálaš sálašmearri lea ovddit meahcástanjagiid láhkai gávcci geatkki. Ministeriija ásahusa mielde spiehkastatlobiid sáhtii mieđihit dušše geatkenáli dikšunplánas meroštallojuvvon davvi ja nuortta boazodoalloguovllu nálledikšunguvlui, gos geatkki dahkan boazovahágat eanaš leat.
Geatkái girjejedje jagi 2021 badjel 1 900 boazovahága, mii lea 40 proseantta buot mannan jagi stuorraspiriid dagahan buhttejuvvon boazovahágiin. Vássán dálvvi áigge vahágiid mearri leamašan stuorit go ovddit dálvve. Vahátákkalaš spiehkastatlobiin lea mihttomearri geahpedit geatkki dagahan earenoamáš stuorra boazovahágiid.
Luondduváriidguovddáža mielde Suomas árvvoštalle leat guovvamánus 2021 oktiibuot 390–400 geatkki, main 160–170 boazodoalloguovllus. Šládja lea leavvan maŋimuš jagiid ain eanet maiddái boazodoalloguovllu máttabeallái ja áicamat getkkiin dahkkojuvvojit otná beaivve gitta máttimus Suoma ráje. Suoma geatkenálli lea lassánan 1990-logu álgu ektui sulaid logigeardásažžan. Ovttadatmeari šaddan leamašan maŋimuš vássán logi jagi áigge áigge garrasut go ovdal.