Mieđihuvvon bivdolohpemearri lovttai ovddit jagis 35 proseantta. Ovddit bivdobajis Lappis godde 4 343 ealgga, main badjelaš 37 % ledje miesit. Mieđihuvvon 4 458 bivdolobis geavahedje 79 proseantta.
Čavčča 2025 meahcástanbadjái mieđihuvvon bivdolohpemeari vuođđun lea Lappi guvllolaš fuođđoráđi giđđat 2024 Lappi ovcci ealgadoalloguvlui ásahan ealgadoalloguovlluguovdasaš ealganáli dávjodatmihttomeriin Mihttomearregaskkaid čuvvon ealgamáddodat Lappis lea 13 639–19 831 ealgga, gaskamearálaččat sulaid 16 735 ealgga. Mannan čavčča bivddu maŋŋá báhcán nálli lei Luondduriggodatguovddáža nálleárvvoštallama mielde 17 100 ealgga.
Ealgamáddodaga miessebuvttadeapmi lea Lappis badjánan bárrovuođu maŋŋá máŋggaid jagiid áigge, eandalii buorre miessebuvttadeapmi leamašan Máttaoarje- ja Mátta-Lappis. Meahcásteami maŋŋá lean ealgamáddodagas mihttomearrin leat 20-30 % miesit, maiguin figgat bajásdoallat máddodaga ahkeráhkadusa buvttadeaddjin ja ealgamáddodaga ahkeluohkáid einnostuvvon sturrosažžan. Mihttomeari fáhtema dihtii mieđihuvvon bivdolobiin leat lasihuvvon misiid ossodaga máŋggain guovlluin.
Dál go miesselobit leat eanet go leat hárjánan, mihttomearrámet lea, ahte dat maiddái ávkkástallojit. Máŋggat sáhttet jurddašit, ahte misiid lobiid galgá seastit, vai boahttevaš jagiide leat ealggat. Ealga lea goittotge guhkesagat ealli, iige mieđihuvvon miesselobiin leat riska das, ahte muhtun ahkeluohkká báhččojuvvošii oalát eret. Baicce nuppe gežiid, doarvái stuorra miessesállaša lea máŋggain guovlluin váttis oažžut ja miesit leat báhcán dálvádit eanet go leat háhpohallan, nappo vuollel 30 proseantta. Go bivdit ealgamáddodaga buvttadeami eatge buvttadeaddji rávesmáddodaga, beassat dássidit ealgamáddodaga ovdáneapmái ja garvit stuorra máddodatmolsašuddamiid”, muitala Suoma fuođđoguovddáš Lappi fuođđoplánejeaddji Eerojuhani Laine.
Ealggaid dagahan johtalus- ja vuovdevahágiid mearri Lappis lea bisson govttolažžan. Ovddit golmma jagi áigge Lappis leat jahkásaččat leamašan sulaid 90 ealgabártti ja ealggaid dagahan vuovdevahágiid leat buhtten sulaid 50 000 euro ovddas jagis. Álgojagi ealgabárttiid mearri 26 bártti lea statistihkaid vuođul seammá dásis go ovddit jagiid dávisteaddji áiggiin. Mieđihuvvon lohpemeriin ealggaid dagahan vahágiid figgat doallat govttolaš dásis, váldimiin vuhtii guvllolaš sierrasárgosiid ealganáli dikšumis ja seailluhit ealganáli eallinfámolažžan.
Ealgabivddu vuosttas bivdoáigodat Lappis lea 1.9.-20.9. Nubbi bivdoáigodat álgá 4.10.2025 ja nohká 15.1.2026. Boazodoalloguovllus beatnaga ávkkástallan bivddus lea gildojuvvon 1.1.-15.1.2026. Bivddus galgá váldit vuhtii boazodoalu ja eará luonddus johttiid. Deháleamos lea giddet earenoamáš fuomášumi dasa, ahte bivdu dáhpáhuvvá dorvvolaččat.
Additional information
Laine, Eerojuhani
- Fuođđoplánejeaddj
- +358 (0)29 431 2124
- eerojuhani.laine@riista.fi