Suoma fuođđoguovddáža mieđihan vahátákkalaš spiehkastatlobiiguin godde vássán juovla- ja ođđajagimánu áigge gávcci geatkki. Spiehkastatlobiiguin bivde Lappis guhtta ja Kainuus ovtta ja Oulu guovllus ovtta. Eanodagas, Sallas ja Soađegilis, Suomussalmis, Taivalkoskis ja Ohcejogas ožžo sálašin ovtta geatkki, Anáris guokte. Getkkiin golbma ledje varrásat ja vihtta njiŋŋálasa
Eana- ja meahccedoalloministeriija ásahan alimus lobálaš sálašmearri vássi bivdojahkái lea ovddit golmma meahcástanjagiid láhkai gávcci geatkki. Ministeriija ásahusa mielde spiehkastatlobiid sáhttá mieđihit dušše geatkenáli dikšunplánas meroštallojuvvon davvi ja nuortta boazodoalloguovllu nálledikšunguvlui, gos geatkki dahkan boazovahágat eanaš leat. Geatkkit leat oasálaččat badjel bealis stuorrabeađuid dahkan boazovahágiin, mat leat buhttejuvvon.
Luondduváriidguovddáža mielde Suomas árvvoštalle lean dálvit 2018/2019 oktiibuot 250-280 geatkki, main 110-130 boazodoalloguovllus. Jahkásaččat dahkkojuvvon fuođđogolbmačiegarehkenastimiid vuođu getkkiid mearri šaddan máŋggageardásažžan olles riikkas maŋimus 20 jagi áigge ja šládja lea leavvan maŋimuš jagiid eanet maiddái boazodoalloguovllu máttabeale Supmii. Geatkki luottaid sáhttá otná beaivve oaidnit gitta máttimus Suoma ráje.