Suoma fuođđoguovddáš mieđihii guovvamánus spiehkastatlobiid gávcci geatkki goddima várás. Sálašin ožžo njukčamánu beallemuttu rádjái guhtta varrása ja guokte njiŋŋelasa.
Luondduriggodatguovddáža dutkamušaid mielde goddojuvvon njiŋŋelasat ledje nuorra geatkkit, mat eai lean velá guoddán. Vahágiidda vuođđuduvvi spiehkastatlobiigun bivde golbma geatkki Eanodagas, guokte Anáris ja ovtta geatkki Soađegili, Savukoski ja Salla guovlluin.
Eana- ja meahccedoalloministeriija lei ásahusas mearridan, ahte spiehkastatlobiid sáhtii mieđihit dán jagi eanemustá gávcci geatkái. Ministeriija ásahusa mielde spiehkastatlobiid sáhtii mieđihit dušše boazodoalloguovllu davvi ja nuorta osiide. Ásahusas dát guovllut ledje meroštallojuvvon geatkki náli dikšunplánas dakkár guovlun, gosa getkkiide sáhttá addit spiehkastatbivdolobiid, go dáin guovlluin leat stuorimus boazovahágat.
Luondduriggodatguovddáš celkkii skábmamánu loahpas, ahte Suomas leat árvvu mielde 220-250 geatkki. Geatki lea leavvan maŋimuš jagiid áigge ain eanet boazodoalloguovllu máttabeallái ja geatkki sáhttá vuohttit maid máttimus Suomas.
Lassedieđut:
Sami Tossavainen, fuođđohoavda, Suoma fuođđoguovddáš
tel. 029 431 2304 sami.tossavainen@riista.fi
Urpo Kainulainen, fuođđoplánejeaddji, Suoma fuođđoguovddáš Lappi
tel. 029 431 2252 urpo.kainulainen@riista.fi