Ealgabivdit válde bures atnui mannán čavčča ealgaealliáiccuid ja sállašiid muitui merkema elektronalaš Oma riista -bálvalusas. Boahtte giđa ealgaealliid bivdolobiid ohcet vuosttas geardde elektronalaččat. Suoma fuođđoguovddážis jáhkket, ahte ođđaáigásaš lohpeohcanbálvalus váldojuvvo bures vuostá.
Suoma fuođđoguovddáža guovlludoaimmahagat gieđahallet jahkásaččat moaddeduhát ealgaealli bivdolohpeohcamuša. Bivdolobiid ohcan šaddá álkibun, go lohpeguovlu meroštallojuvvo ja ohcamuša dieđut devdojuvvojit ja dárbbu mielde dievasmahttojuvvojit dihtoriin. Bálvalus rehkenastá maid lohpeguovllu viidodaga automáhtalaččat. Earenoamážit stuorra oktasašlobiid olis ollu áiggi dolvon ohcamušgárttá sárgun báhcá vássánáigái.
Bivdolobiid ohcama vuođđun lea giđa áigge dahkkojuvvon geahpedanplána. Fuođđogáhttensearvvit leat dahkan juohke ealgadoalloguvlui plánaid, main leat ulbmilat ovdamearkka dihte dasa, man ollu ealggat galget leat ja ealganáli ráhkadussii. Meahcásteami ulbmiliid leat ásahan guovlludási fuođđoráđit čanusjoavkkuid gullama maŋŋá.
Geahpedanplána vuođđun leat Luondduriggodatguovddáža ealganálleárvvoštallamat ja buvttadanlogut. Dat fas vuođđuduvvet ealgabivdiid áico- ja sálašdieđuide, maid sii leat čoaggán bivdobaji áigge.
Ealgaelliid elektronalaš bivdolohpeohcamuša galgá leat báikki alde maŋimuštá miessemánu 2. beaivve dasgo cuoŋománu 30. beaivi lea sotnabeaivi. Suoma fuođđoguovddáš mearrida áššis maŋimustá suoidnemánu 25. beaivve.
Juos háliida, de ealgaealli bivdolobi sáhttá ohcat vel maid bábirskoviin. Ovddit áiggiin lea nuppástuvvan dat, ahte dál bábirohcamuša galgá sáddet oktan čuvvosiiguin nu, ahte dat lea Suoma fuođđoguovddáža guovlludoaimmahagas miessemánu 2. Dasa lassin ohcci galgá doaimmahit kopiija bábirohcamušas fuođđogáhttensearvái.
Lassedieđut
Guovllu dási lassedieđut fuođđohoavddain https://riista.fi/riistahallinto/yhteystiedot/