Meahcástanlága mielde nuppástusa ohcan dahjege váidin Suoma fuođđoguovddáža dahkan mearrádussii lea mearriduvvon fuođđohálddahuslágas. Suoma fuođđoguovddáš dikšu meahcástanlága čuovvu lohpeáššiid almmolaš hálddahusdoaibman ja addá mearrádusa girjjálaččat.
Hálddahuslága mielde ákkastallat dáhpáhusaid guovdu ja ákkastallamiin boahtá ovdan, mat áššit ja čielggadusat leat váikkuhan čovdosii ja máinnašuvvojit njuolggadusat, mat leat heivehuvvon mearrádussii. Mearrádussii laktojuvvo álo váiddačujuhus, man hálddahusláhka geatnegahttá, go buot Suoma fuođđoguovddáža dahkan mearrádusaid sáhttá váidit. Mearrádus doaimmahuvvo lobi ohccái sihke diehtun áššáiosolaččaide ja daidda, geain lea sierra váiddavuoigatvuohta áššáiosolaš mearrádusas.
Váiddačujuhusas čielggaduvvojit dárkileappot gáibádusat váiddareivve sisdoalus ja mildosiin ja váidaga doaimmaheamis rivttes guovlulaš hálddahusriektái. Jus váidaleaddji ii leat duhtavaš hálddahusrievtti addán mearrádussii, váidaleaddji sáhttá ohcat dasa nuppástusa alimus hálddahusrievttis, jus alimus hálddahusriekti addá dasa váidinlobi.
Vuođđojurdaga mielde gii beare sáhttá váidit mearrádusas, muhto láhkaásaheamis leat goittotge dahkkon ráját dasa, mo ja gii sáhttá ohcat nuppástusa ovttaskas mearrádussii. Hálddahuslágageavahanlága mielde mearrádusas sáhttá váidit dat, geasa mearrádus lea čujuhuvvon dahje gean riektái, geatnegasvuhtii dahje ovdui mearrádus njuolga čuohcá.
Meahcástanlágas ásahuvvo sierranjuolggadusa bokte das, ahte Suoma fuođđoguovddáža dahkan spiehkastatlohpeáššiid váiddavuoigatvuohta lea maiddái dakkár registrerejuvvon báikkálaš dahje guovlulaš servošis, man mihttomearrin lea luonddu- ja birassuodjaleami ovddideapmi. Jus váidaleaddjis ii leat váiddariekti láhkaásaheami vuođul, váidda guđđojuvvo dutkkakeahttá hálddahusduopmostuolus.