Guovžabivdu álgá boazodoalloguovllus

Boazodoalloguovllus oažžu njeaidit eana- ja meahccedoalloministeriija earreásahusa vuođul eanemustá 42 guovžža, main 12 oarjjabeale ja 30 nuorttabeale boazodoalloguovllus. Mannan jagi sálašin ožžo oarjjabeale boazodoalloguovllus 12 ja nuorttabeale boazodoalloguovllus 27 guovžža. Guovžabivdu álgá gaskavahku 20.8.

Meahcástanjagi 2014-2015 oppalašearri Suomas lea 115 guovžža, main nu gohčoduvvon nálledikšuma spiehkastatlobiin oažžu njeaidit boazodoalloguovllu máttabealde eanemustá 73 guovžža ja boazodoalloguovllus gaskkaldupmemeahcásteamis 42 guovžža. Dáid lobiid lassin Suoma fuođđoguovddáš sáhttá mieđihit dárkilis vihkkehallama vuođul spiehkastatlobiid vahága dahje áitaga dáhkan guovžžaid njeaidimii. Vahátákkalaš lobiid mearri ii leat ráddjejuvvon.

Guovžža sáhttá boazodoalloguovllus meahcástit ásahusa oaivvilduvvon eari mielde golggotmánu loahpa rádjai dahje nu guhká go earri lea ain leahkimin. Juohkehaš goddojuvvon guovžžas galgá dalánaga dahkat almmuhusa Suoma fuođđoguovddáža guovžatelefovdnii, man nummir lea 029 431 2500. Guovžatelefovnnas sáhttá maiddái guldalit beaivvi guovžaeari dili boazodoalloguovllus. Dili beaivádit maiddái Suoma fuođđoguovddáža internetsiidduin čujuhusas www.riista.fi. Guovžabivdit sáhttet almmuhit sálašalmmuhusa njeidojuvvon guovžžas dál maiddái elektrovnnalaččat fuođđoguovddáža bajásdoallán Oma riista –bálvalusas čujuhusas oma.riista.fi.
Jus boazodoalloguovllu earri oarjjabeale dahje nuorttabeale boazodoalloguovllu dáfus dievvá, meahcástus dán guovllus gaskkaldahtto Suoma fuođđoguovddáža mearrádusain. Guovžabivdui oasi váldán olbmot galget čuovvut earredili guovžatelefovnnas dahje internetsiidduin. Guovlulaš eari vejolaš dievvamis dieđihuvvo maiddái áviissaid ja rádio bokte.

Boazodoalloguovllu máttabealde stuorámus oassi nálledikšunvuđđosaš earis (eanemustá 49 guovžža) bivdojuvvojit Nuorta-Suoma stáđásmuvvan náli dikšunguovllus. Oarjjabeale leavvanavádagas sáhttá njeaidit eanemustá 18 guovžža ja Mátta-Nuortabađaeatnama, Gaska-Nuortabađaeatnama ja Pirkanmaa eanagottiid gárggiideaddji náli guovllus guhtta guovžža. Suoma guovžanáli dikšunplána mihttomearri lea guovžanáli dássidut juohkašuvvan ja leavvan maiddái oarjjabeale Supmii. Dikšunplánii ii leat biddjojuvvon šaddanmihttomearri boazodoalloguovllu guovžanállái.

Fuođđo- ja guolledoalu dutkanlágádusa mielde Suomas leat ovdal gaskavahku meahcástanbaji oktiibuot 1 140-1 270 badjel jagi ahkásaš guovžža, main 240-290 boazodoalloguovllus. Jagi 2014 čivgabuvttadeapmin FGDL lea árvvoštallan oppa riikii oktiibuot 265 guovžžačivgga, main boazodoalloguvlui árvvoštallet riegádan 70. Boazodoalloguovllu guovžanálli lea čivgaáicamiid vuođul ain eanaš nuortarájá lahkasiin ja mearkkašahtti oassi rájá alde geasi orron guovžžain vádjolit čavčča mielde dálvenahkáriidda Ruošša beallái.

Additional information